ದೆಹಲಿ: ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ಸಂಚು ರೂಪಿಸಿದ್ದ ಭಯಾನಕ ಭಯೋತ್ಪಾದಕ ದಾಳಿಯನ್ನು ಹತ್ತಿಕ್ಕುವಲ್ಲಿ ಭಾರತದ ಗುಪ್ತಚರ ಸಂಸ್ಥೆಗಳು ಯಶಸ್ವಿಯಾಗಿವೆ. ಬೃಹತ್ ಕಾರ್ಯಾಚರಣೆ ನಡೆಸಿ ಏಜೆಂಟ್ಗಳನ್ನು ಬಂಧಿಸಿ ಆಗಬಹುದಾಗಿದ್ದ ದೊಡ್ಡ ದುರಂತವನ್ನು ತಡೆಯಲಾಗಿದೆ .ಐಎಸ್ಐ (ಪಾಕಿಸ್ತಾನದ ಇಂಟರ್ ಸರ್ವೀಸಸ್ ಇಂಟಲಿಜೆನ್ಸ್) ಸಂಸ್ಥೆಯು ದೆಹಲಿಯಲ್ಲಿ ಭಯೋತ್ಪಾದಕ ದಾಳಿ ನಡೆಸಲು ಸಂಚು ರೂಪಿಸಿತ್ತು. ಪಹಲ್ಗಾಮ್ನಲ್ಲಿ ಭಯೋತ್ಪಾದಕ ದಾಳಿಗೂ ಮೊದಲೇ ದೆಹಲಿಯಲ್ಲಿ ದಾಳಿ ಮಾಡಲು ಪಾಕಿಸ್ತಾನ ಬೆಂಬಲಿತ ಭಯೋತ್ಪಾದಕರು ಸಜ್ಜಾಗಿದ್ದರು. ಆದ್ರೆ ಐಎಸ್ಐನ ತರಬೇತಿ ಪಡೆದ ಏಜೆಂಟ್ಗಳನ್ನು ಭಾರತದ ಗುಪ್ತಚರ ದಳ ಪತ್ತೆ ಹಚ್ಚಿ, ಮೂರು ತಿಂಗಳ ಕಾಲ ನಡೆದ ರಹಸ್ಯ ಕಾರ್ಯಾಚರಣೆಯಲ್ಲಿ ಸಿಕ್ಕಿಬಿದ್ದ ಇಬ್ಬರು ವ್ಯಕ್ತಿಗಳನ್ನು ಬಂಧಿಸಲಾಗಿದೆ. ಬಂಧಿತರಲ್ಲಿ ಒಬ್ಬಾತ ಪಾಕಿಸ್ತಾನದ ಏಜೆಂಟ್ ಅನ್ಸಾರುಲ್ ಮಿಯಾ ಅನ್ಸಾರಿ. ಈತ ಭಾರತೀಯ ಸಶಸ್ತ್ರ ಪಡೆಗಳ ಬಗ್ಗೆ ಸೂಕ್ಷ್ಮ ಮಾಹಿತಿಯನ್ನು ಕಲೆಹಾಕುವ ಜವಾಬ್ದಾರಿಯನ್ನು ಹೊತ್ತಿದ್ದನು.
ಒಂದೆಡೆ ಭಾರತದ ಯೂಟ್ಯಬರ್ಗಳ ಬಳಕೆ, ಇನ್ನೊಂದೆಡೆ ದೆಹಲಿಯಲ್ಲಿರುವ ಪಾಕ್ ಹೈ ಕಮಿಷನ್ ಸಿಬ್ಬಂದಿಗಳ ಕೈವಾಡದ ಬಗ್ಗೆಯೂ ತನಿಖಾದಿಕಾರಿಗಳು ಅನುಮಾನ ವ್ಯಕ್ತಪಡಿಸಿದ್ದಾರೆ. ಐಎಸ್ಐ ಅಧಿಕಾರಿಗಳಾದ ಮುಜಾಮಿಲ್ ಮತ್ತು ಎಹ್ಸಾನ್-ಉರ್-ರಹೀಮ್ ಅಲಿಯಾಸ್ ಡ್ಯಾನಿಶ್, ಇವರು ಭಾರತೀಯ ಯೂಟ್ಯೂಬರ್ಗಳು ಮತ್ತು ಪ್ರಭಾವಿ ವ್ಯಕ್ತಿಗಳನ್ನು ಬಳಸಿಕೊಂಡು ಈ ಸಂಚಿನಲ್ಲಿ ಭಾಗಿಯಾಗಿದ್ದರು ಎಂದು ಶಂಕಿಸಲಾಗಿದೆ.
ಜನವರಿಯಲ್ಲಿ ಭಾರತದ ಗುಪ್ತಚರ ದಳಕ್ಕೆ ಒಂದು ಸುಳಿವು ಸಿಕ್ಕಿತ್ತು. ಪಾಕ್ ಇಂಟಲಿಜೆನ್ಸ್ ಓರ್ವ ಗೂಢಚಾರನನ್ನು ಕಳುಹಿಸಿದೆ ಎಂದು ಮಾಹಿತಿ ಇತ್ತು. ಆತ ಸೂಕ್ಷ್ಮ ದಾಖಲೆಗಳು, ಚಿತ್ರಗಳು ಮತ್ತು ಗೂಗಲ್ ಕೋ ಆರ್ಡಿನೇಟ್ಸ್ ಮಾಹಿತಿಗಳನ್ನು ಕಲೆಹಾಕಲು ದೆಹಲಿಗೆ ನೇಪಾಳದ ಮೂಲಕ ಬರಲಿದ್ದಾನೆ ಎಂದು ತಿಳಿದುಬಂದಿತ್ತು. ಈ ಸುಳಿವಿನ ಆಧಾರದ ಮೇಲೆ ತನಿಖೆ ನಡೆಸಲಾಯಿತು. ಸಶಸ್ತ್ರ ಪಡೆಗಳ ಮಾಹಿತಿಯನ್ನು ಬಳಸಿ ದಾಳಿ ಮಾಡಲು ಯೋಜನೆ ಹಾಕಲಾಗಿತ್ತು. ಆದರೂ ಗುಪ್ತಚರ ಅಧಿಕಾರಿಗಳು ಫೆಬ್ರವರಿ ಮಧ್ಯದವರೆಗೆ ಕಾಯಬೇಕಾಯಿತು. ಐಎಸ್ಐ ಏಜೆಂಟ್ ದೆಹಲಿಗೆ ಬಂದು ಸೇರಿಕೊಂಡಿದ್ದ. ಆತ ಮಿಲಿಟರಿಯ ಸೂಕ್ಷ್ಮ ಹಾಗೂ ರಹಸ್ಯ ದಾಖಲೆಗಳನ್ನು ಕಲೆಹಾಕಿದ್ದ. ಫೆಬ್ರವರಿ 15 ರಂದು ದೆಹಲಿಯ ಮಧ್ಯಭಾಗದಲ್ಲಿ ಏಜೆಂಟ್ ಅನ್ಸಾರಿಯನ್ನು ಬಂಧಿಸಲಾಯಿತು. ಅನ್ಸಾರಿ ವಿರುದ್ಧ ರಹಸ್ಯ ಕಾಯ್ದೆ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ. ಆತ ಸೂಕ್ಷ್ಮ ದಾಖಲೆಗಳೊಂದಿಗೆ ನೇಪಾಳದ ಮೂಲಕ ಪಾಕಿಸ್ತಾನಕ್ಕೆ ಹೋಗಲು ಸಿದ್ಧನಾಗಿದ್ದ.
ಈ ಕಾರ್ಯಾಚರಣೆಯು ಒಂದು ಮಾಸ್ಟರ್ ಕ್ಲಾಸ್ ಆಗಿತ್ತು. ಏಜೆನ್ಸಿ ಅಧಿಕಾರಿಗಳು ಪ್ರತಿ ಹಂತದಲ್ಲೂ ಗೂಢಚಾರನಿಗಿಂತ ಒಂದು ಹೆಜ್ಜೆ ಮುಂದಿದ್ದರು. “ನಮ್ಮ ಸಿಬ್ಬಂದಿ ಭಾರತದ ವಿವಿಧ ಭಾಗಗಳಲ್ಲಿ ಸಕ್ರಿಯವಾಗಿರುವ ಪಾಕ್ ಬೆಂಬಲಿತ ಭಯೋತ್ಪಾದಕ ಸಂಘಟನೆಗಳ ಬಗ್ಗೆ ಮಾಹಿತಿ ಕಲೆಹಾಕುತ್ತಿದ್ದರು. ಸ್ಲೀಪರ್ ಸೆಲ್ಗಳು ಅವರಿಗೆ ಸಹಾಯ ಮಾಡುತ್ತಿದ್ದವು. ಪಂಜಾಬ್ನಲ್ಲಿ ಪೊಲೀಸ್ ಠಾಣೆಗಳ ಹೊರಗೆ ಗ್ರೆನೇಡ್ ದಾಳಿಗಳು ನಡೆದವು. ಇದನ್ನು ಐಎಸ್ಐ ಬೆಂಬಲಿತ ಭಯೋತ್ಪಾದಕ ಸಂಘಟನೆ ಬಬ್ಬರ್ ಖಾಲ್ಸಾ ಇಂಟರ್ನ್ಯಾಷನಲ್ (BKI) ಮಾಡಿತ್ತು. ಹೀಗಾಗಿ, ಉತ್ತರ ಭಾರತದ ವಾಯುವ್ಯ ಭಾರತದಲ್ಲಿ ದೊಡ್ಡ ಮಟ್ಟದ ದಾಳಿ ನಡೆಯುವ ಸಾಧ್ಯತೆ ಇರುವ ಬಗ್ಗೆ ಅಧಿಕಾರಿಗಳಿಗೆ ಅನುಮಾನವಿತ್ತು ಎಂದು ಮೂಲಗಳು ತಿಳಿಸಿವೆ.
ಮುಂದುವರಿದು, ತನಿಖೆಯಲ್ಲಿ ಅಖ್ಲಾಕ್ ಅಜಮ್ ಎಂಬಾತನ ಪಾತ್ರವೂ ಬಯಲಾಯಿತು. ಈತ ರಾಂಚಿಯ ನಿವಾಸಿಯಾಗಿದ್ದು, ಭಾರತದಲ್ಲಿ ಬಂಧಿತ ಅನ್ಸಾರುಲ್ಗೆ ಸಹಾಯ ಮಾಡುತ್ತಿದ್ದನು. ಇಬ್ಬರೂ ಪಾಕಿಸ್ತಾನದ ಹ್ಯಾಂಡ್ಲರ್ಗಳೊಂದಿಗೆ ನಿರಂತರ ಸಂಪರ್ಕದಲ್ಲಿದ್ದರು. ಅವರ ಸಂಭಾಷಣೆಗಳು ಸಂಶಯಾಸ್ಪದವಾಗಿದ್ದವು. ಅಜಮ್ನನ್ನು ಮಾರ್ಚ್ನಲ್ಲಿ ಬಂಧಿಸಲಾಯಿತು. ಮೊಬೈಲ್ ಫೋನ್ಗಳನ್ನು ಪರಿಶೀಲಿಸಿದಾಗ ಸಂಶಯಾಸ್ಪದ ಸಂಭಾಷಣೆಗಳು ಕಂಡುಬಂದವು. ಇವರಿಬ್ಬರೂ ದೊಡ್ಡ ಸಂಚಿನಲ್ಲಿ ಭಾಗಿಯಾಗಿದ್ದಾರೆ ಎಂದು ತಿಳಿದುಬಂತು. ಇಬ್ಬರ ವಿರುದ್ಧವೂ ನ್ಯಾಯಾಲಯಕ್ಕೆ ಚಾರ್ಜ್ಶೀಟ್ ಸಲ್ಲಿಸಲಾಗಿದೆ.
ಫೆಬ್ರವರಿಯಲಿ ಬಂಧಿತನಾದ, ಪಾಕ್ ಏಜೆಂಟ್ ಅನ್ಸಾರಿ ಹಿನ್ನೆಲೆಯನ್ನು ಪರಿಶೀಲಿಸಿದಾಗ ಆತ ವಂಚನೆಯಲ್ಲಿ ತೊಡಗಿಸಿಕೊಂಡಿರುವುದು ತಿಳಿದುಬಂತು. ವಿಚಾರಣೆಯ ಸಮಯದಲ್ಲಿ ಅನ್ಸಾರಿ ತಾನು ಮೂಲತಃ ನೇಪಾಳದವನು ಎಂದು ಹೇಳಿದ್ದು, 2008 ರಿಂದ ಕತಾರ್ನಲ್ಲಿ ಟ್ಯಾಕ್ಸಿ ಡ್ರೈವರ್ ಆಗಿ ಕೆಲಸ ಮಾಡುತ್ತಿದ್ದನು. ಅಲ್ಲಿ ಆತನನ್ನು ಐಎಸ್ಐ ಕಾರ್ಯಕರ್ತನಾಗಿ ನೇಮಿಸಿಕೊಂಡಿದ್ದನು. ಹಣದ ಆಮಿಷವೊಡ್ಡಿ, ನಂತರ ಮೈಂಡ್ ವಾಶ್ ಮಾಡಲಾಯಿತು. ಪಾಕಿಸ್ತಾನಕ್ಕೆ ಹೋಗಿ ರಾವಲ್ಪಿಂಡಿಯಲ್ಲಿ ತನ್ನ ಹ್ಯಾಂಡ್ಲರ್ನನ್ನು ಭೇಟಿಯಾಗಲು ಸೂಚಿಸಲಾಗಿತ್ತು.”ಜೂನ್ 2024 ರಲ್ಲಿ, ಆತ ಒಂದು ತಿಂಗಳ ಕಾಲ ಪಾಕಿಸ್ತಾನಕ್ಕೆ ಭೇಟಿ ನೀಡಿದ್ದನು. ಅಲ್ಲಿ ಆತನನ್ನು ಪಾಕಿಸ್ತಾನಿ ಸೇನೆಯ ಉನ್ನತ ಅಧಿಕಾರಿಗಳಿಗೆ ಪರಿಚಯಿಸಲಾಯಿತು. ಬಾಬರಿ ಮಸೀದಿ ಧ್ವಂಸ ಮತ್ತು ಭಾರತದಲ್ಲಿ CAA/NRC ಅನುಷ್ಠಾನದಂತಹ ವಿಷಯಗಳ ಬಗ್ಗೆ ಚರ್ಚಿಸಿ ಆತನನ್ನು ಕೃತ್ಯಕ್ಕೆ ಪ್ರೇರೇಪಿಸಲಾಯಿತು. ಅನ್ಸಾರಿಗೆ ಗೂಢಚಾರಿಕೆಯ ತರಬೇತಿಯನ್ನು ನೀಡಲಾಯಿತು. ದೆಹಲಿಯಿಂದ ರಹಸ್ಯ ದಾಖಲೆಗಳನ್ನು ತರಲು ಸೂಚಿಸಲಾಯಿತು” ಎಂದು ನ್ಯಾಯಾಲಯಕ್ಕೆ ಸಲ್ಲಿಸಿದ ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
ಶೀಘ್ರದಲ್ಲೇ ಈ ಇಬ್ಬರು ಬಂಧಿತರ ವಿಚಾರಣೆ ಪ್ರಾರಂಭವಾಗಲಿದೆ. ನ್ಯಾಯಾಲಯವು ಚಾರ್ಜ್ಶೀಟ್ ಅನ್ನು ಪರಿಗಣಿಸಿದೆ. ಬಂಧಿತ ಇಬ್ಬರು ಆರೋಪಿಗಳನ್ನು ತಿಹಾರ್ ಜೈಲಿನ ಹೆಚ್ಚಿನ ಭದ್ರತಾ ವಿಭಾಗದಲ್ಲಿ ಇರಿಸಲಾಗಿದೆ. ಅವರು ಇತರ ಕೈದಿಗಳನ್ನು ಪ್ರಭಾವಿಸದಂತೆ, ವಿಶೇಷ ನಿಗಾ ಇರಿಸಲಾಗಿದೆ. “ರಾಷ್ಟ್ರೀಯ ಭದ್ರತೆಗೆ ಯಾವುದೇ ಬೆದರಿಕೆ ಬರದಂತೆ ನಾವು ಎಚ್ಚರಿಕೆ ವಹಿಸಿದ್ದೇವೆ. ಇದು ಬೆಕ್ಕು ಮತ್ತು ಇಲಿಯ ಆಟವಾಗಿರಬಹುದು. ಆದರೆ ಭಾರತದ ಏಜೆನ್ಸಿಗಳು ಮೇಲುಗೈ ಸಾಧಿಸಲು ಬಯಸುತ್ತವೆ” ಎಂದು ಹೆಸರೇಳಲು ಇಚ್ಛಿಸದ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
