ಜಸ್ಟ್ 2.1%! ಚಿಲ್ಲರೆ ಹಣದುಬ್ಬರದಲ್ಲಿ ದಾಖಲೆಯ ಕುಸಿತ, ಸಾಲಗಾರರಿಗೆ ಆಗಸ್ಟ್ನಲ್ಲಿ ಮತ್ತೆ ಗುಡ್ ನ್ಯೂಸ್?
ತರಕಾರಿ, ಬೇಳೆಕಾಳು, ಮಾಂಸ ಹಾಗೂ ಹಾಲಿನ ದರ ಇಳಿಕೆ ಹಿನ್ನೆಲೆಯಲ್ಲಿ ಜೂನ್ನಲ್ಲಿ ಚಿಲ್ಲರೆ ಹಣದುಬ್ಬರ ಶೇ. 2.1ಕ್ಕೆ ಇಳಿಕೆ ಕಂಡಿದೆ. ಇದು ಕಳೆದ ಆರು ವರ್ಷಗಳಲ್ಲೇ ಅತ್ಯಂತ ಕಡಿಮೆ. 2024ರ ಜೂನ್ನಲ್ಲಿ ಶೇ. 5.08ರಷ್ಟಿತ್ತು. ಇತ್ತ, ಸಗಟು ಹಣದುಬ್ಬರ ದರವು ಜೂನ್ನಲ್ಲಿ ಶೇ. 0.13ಕ್ಕೆ ಇಳಿಕೆ ಕಂಡಿದೆ. ಇದು 15 ತಿಂಗಳಲ್ಲೇ ಕನಿಷ್ಠ ಮಟ್ಟವಾಗಿದೆ.ಆದಾಗ್ಯೂ, ಜಾಗತಿಕ ಸಂಘರ್ಷದ ಹಿನ್ನೆಲೆಯಲ್ಲಿ ಸಗಟು ಹಣದುಬ್ಬರ ಏರಿಕೆಯಾಗುವ ಸಾಧ್ಯತೆಯನ್ನು ಅಲ್ಲಗಳೆಯಲು ಆಗುವುದಿಲ್ಲ. ಸಗಟು ಹಣದುಬ್ಬರ ಮೇನಲ್ಲಿ ಶೇ. 0.39ರಷ್ಟಿತ್ತು. ಇದು 14 ತಿಂಗಳಲ್ಲೇ ಅತ್ಯಂತ ಕನಿಷ್ಠ ಎಂದೆನಿಸಿತ್ತು. ಕಳೆದ ವರ್ಷದ ಜೂನ್ನಲ್ಲಿ ಶೇ. 3.43ರಷ್ಟಿತ್ತು.
ತರಕಾರಿ, ಈರುಳ್ಳಿ ಆಲೂಗಡ್ಡೆ ಬೆಲೆ ಕುಸಿದಿರುವ ಕಾರಣಕ್ಕೆ ಜೂನ್ನಲ್ಲಿ ಆಹಾರ ವಸ್ತುಗಳ ಬೆಲೆ ಶೇ. 3.75ರಷ್ಟು ಇಳಿಕೆ ಕಂಡಿದೆ. ಜೂನ್ನಲ್ಲಿ ತರಕಾರಿಗಳ ಸಗಟು ಹಣದುಬ್ಬರ ಶೇ. 22.65ರಷ್ಟಿದೆ. ಮೇನಲ್ಲಿ ಶೇ. 21.62ರಷ್ಟು ಇತ್ತು.
ಹಣದುಬ್ಬರ ಇಳಿಕೆಗೆ ಕಾರಣವೇನು?
- ತರಕಾರಿ, ಮೊಟ್ಟೆ, ದ್ವಿದಳ ಧಾನ್ಯ, ಮಾಂಸ ಮತ್ತು ಮೀನು, ಏಕದಳ ಧಾನ್ಯ, ಹಾಲು ಮತ್ತು ಹಾಲಿನ ಉತ್ಪನ್ನಗಳ ಬೆಲೆ ಇಳಿಕೆಯೇ ಇದಕ್ಕೆ ಕಾರಣ.
- ಹಣದುಬ್ಬರ ನಿಯಂತ್ರಣದ ಹಿನ್ನೆಲೆಯಲ್ಲಿ ಆರ್ಬಿಐ ಕಳೆದ ತಿಂಗಳು ಶೇ. 0.50ರಷ್ಟು ರೆಪೋ ದರವನ್ನು ಕಡಿಮೆ ಮಾಡಿತ್ತು.
- ಆಹಾರ ಸಾಮಗ್ರಿಗಳು, ಕಚ್ಚಾ ತೈಲಗಳು, ಲೋಹ, ನೈಸರ್ಗಿಕ ಅನಿಲ ವಲಯಗಳಲ್ಲಿ ಬೆಲೆ ಇಳಿಕೆ
- ಕೃಷಿ ಇಳುವರಿಯಲ್ಲಿನ ಗಮನಾರ್ಹ ಹೆಚ್ಚಳದಿಂದ ಹಣದುಬ್ಬರ ಇಳಿದಿದೆ.
ಬಡ್ಡಿ ದರ ಇಳಿಕೆ: ಗರಿಗೆದರಿದ ನಿರೀಕ್ಷೆ
ಹಣದುಬ್ಬರ ಇಳಿಕೆಯಿಂದ ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ಬಿಐ) ಬಡ್ಡಿ ದರವನ್ನು ಇನ್ನಷ್ಟು ಇಳಿಸುವ ಆಸೆ ಗರಿಗೆದರಿದೆ. ಪ್ರಸಕ್ತ ವರ್ಷದಲ್ಲಿ ಆರ್ಬಿಐ ಒಟ್ಟು ಮೂರು ಬಾರಿ ರೆಪೋ ದರವನ್ನು ಇಳಿಸಿದೆ. ಇದರಿಂದ ರೆಪೋ ದರ ಶೇ. 6.50ರಿಂದ ಶೇ. 5.50ಕ್ಕೆ ತಗ್ಗಿದೆ. ಆರ್ಬಿಐನ ಈ ಕ್ರಮದಿಂದ ಹಲವು ಬ್ಯಾಂಕ್ಗಳು ಬಡ್ಡಿ ದರಗಳನ್ನು ಇಳಿಸಿದ್ದು ಗೃಹ, ವಾಹನ ಹಾಗೂ ವೈಯಕ್ತಿಕ ಸಾಲವನ್ನು ಪಡೆದವರ ಇಎಂಐ ಭಾರ ತಗ್ಗಿದೆ.
- 2.1% – ಚಿಲ್ಲರೆ ಹಣದುಬ್ಬರ
- ಇಳಿಕೆ ಹಾದಿಯಲ್ಲಿ ಸಗಟು ದರ ಸೂಚ್ಯಂಕ (ಡಬ್ಲೂಪಿಐ)
- 1.97% – ಜನವರಿ 1997ರಲ್ಲಿನ ಕನಿಷ್ಠ ಚಿಲ್ಲರೆ ಹಣದುಬ್ಬರ
